Í vikunni skrifaði ég grein á Vantrú þar sem ég hvatti foreldra til að skíra ekki börnin sín.

Svosem ekki merkileg grein, ég skrifaði hana sem bloggfærslu á þessa síðu en varð svo hugsað til ritstjórans og ákvað að skella pistlinum frekar á Vantrú.

Eina efnislega gagnrýnin sem ég hef fengið er annars vegar frá sturluðum manni með engan lesskilning og hins vegar gagnrýni á myndina sem ég nota.

Myndina tók ég einhvern tímann þegar Inga María fór að gráta af litlu tilefni. Þetta var eitthvað frekjukast, hún fékk ekki það sem hún vildi. Þarna kúrði hún í fangi móður sinnar og þar sem ég var með myndavélina í höndunum smellti ég af nokkrum myndum.

Ég skil samt ekki ennþá af hverju fólki þykir myndin óviðeigandi. Vissulega er þetta barn ekki á skírnaraldri. Hugsanlega finnst fólki óþægilegt að horfa á grátandi barn. Ég veit það ekki. Sumu finnst eflaust að ég sé að spila með tilfinningar lesenda.

Ég á slatta af myndum af barnaskírn en þótti ekki við hæfi að nota myndir af skírn ættingja minna með þessari grein.

Ef ykkur finnst myndin óviðeigandi mættu þið endilega útskýra fyrir mér af hverju svo er. Mér þætti það fróðlegt.