Það er dálítið notaleg stemming á Ítalíu, ítalskur þjónn var í góðu skapi í dag. Við kíktum með Kollu og Ingu Maríu í hádeginu, amma þeirra passar þær í vetrarfríinu en var bókuð í hádeginu í dag.

Ég fékk mér ravioli með sveppafyllingu, er orðinn svo áhugasamur um ravioli eftir að ég lærði að búa það til sjálfur. Kolla fær sér eiginlega alltaf sjávarréttapasta, Inga Maria pantar margherita pizzu og Gyða fékk sér calzone. Ravioli var afskaplega gott en það hefði alveg mátt spara sósuna. Ingu Maríu þótti minn réttur líka bestur.

Öll vorum við ánægð með matinn en ekki tókst að klára allt enda réttirnir nokkuð stórir og gosdrykkir einnig í stærra lagi. Pastaréttirnir eru dálítið dýrir, á bilinu 2-2500,- krónur. Samtals kostaði hádegisverður fyrir fjóra með gosi handa þremur 10.550,- krónur. Reyndar sé ég núna að við borguðum gos fyrir fjóra - þá þykir mér vatnið mitt orðið heldur dýrt.