Í gvuðanna bænum, ekki falla fyrir almannatengslaherferð ríkiskirkjunnar sem komin er í gang vegna nýrra hjúskaparlaga.

Hér er dæmi um spuna starfsfólks biskupsstofu.

Kirkjan hefur verið þátttakandi í samtalinu um hjúskaparlögin vegna þess að trúfélög á Íslandi hafa umboð til að vígja í hjónaband. Innan kirkjunnar – eins og í samfélaginu öllu – hefur grundvallar viðhorfsbreyting gagnvart samkynhneigðum átt sér stað. #

Þetta er rosalegt "newspeak". Hið rétta er að ríkiskirkjan hefur barist gegn breytingum á hjúskaparlögum. Staðreyndin er að engin grundvallar viðhorfsbreyting hefur orðið gagnvart samkynhneigðum innan kirkjunnar, það eru rétt rúmir tveir mánuðir síðan prestastefna kirkjunnar vísaði tillögu um þetta mál til nefndar, frjálslyndu prestarnir töpuðu þá og játuði sig sigraða.

Staðreyndin er að ríkið tók af skarið, hætti að leyfa kirkjunni að stoppa málið eins og hún hefur gert í a.m.k. fimm ár, og breytti hjúskaparlögum þrátt fyrir andmæli kirkjunnar manna. Nú eltist kirkjan við lögin sem búið er að setja en þykist um leið hafa dregið vagninn. Halldór Baldursson túlkaði þetta ákaflega vel.

Biskup þykist nú biðjast afsökunar en hefur hann tekið orð sín til baka? Ég hef ekki séð það. Hann virðist bara leiður á því að fólk hafi tekið þeim illa. Það er alls ekki það sama.

Ekki falla fyrir spunanum.