Ég sá einhverja umfjöllun á netinu þar sem því var haldið fram að slatti af þrívíddarsjónvarpstækjum hefðu selst á Íslandi. Þetta var tekið sem merki um að kreppan hefði ekki haft áhrif á alla eða eitthvað álíka djúpt og merkilegt. Ég nenni ekki að finna fréttina til að vísa á hér, hún var ekki svo merkileg.

Hvað um það, ég þarf að tuða örlítið.

Þeir sem kaupa sér þrívíddarsjónvarp í dag eru fábjánar! Í alvöru talað. Það er ekki verið að senda neitt út í þrívídd, Það eru sárafáar bíómyndir fáanlegar í þrívídd. Þú þarft sérstakan spilara. Þú þarft að vera með gleraugu. Þetta virkar ekki fyrir alla. Það er ekki kominn neinn staðall. Leikjatölvur styðja ekki þrívíddarsjónvörp. Einhverjir ætluðu að sjá HM í þrívídd en sjá ekkert nema flatan skjáinn.

Fólk sem er búið að kaupa sér þrívíddarsjónvarp ætti að skella sér í meðferð þar sem það horfir á myndina sína (þessa einu) í endalausri lykkju þar til það ælir og uppgötvar að græjufíknin tók völdin af því.

Sjálfur er ég dálítið veikur fyrir stórum HD flatskjá en ekki dettur mér í hug að kaupa slíkt tæki fyrr en ég hef aðgang að einhverju HD efni til að horfa á með slíkum skjá. Ég er svo alltof nískur til að kaupa aðgang að slíku efni.

Þess má geta að ég nennti nákvæmlega ekkert að kynna mér efnið fyrir þess kvabbbloggfærslu. Las ekki einu sinni wikipedia færsluna um þrívíddarsjónvarp (sem ég nenni ekki á vísa á) heldur rétt renndi yfir hana.