Þegar ég var í háskólanámi á árunum 1994-1998 var internetið frekar ungt og fólk eyddi mismiklum tíma hangandi á netinu. Sumir misstu sig þó aðeins og í tölvunarfræðinni voru fáeinir sem eyddu ótæpum tíma í að spila svokallaða mud leiki í Vetrargarði. Menn sátu þá inni í tölvustofu tímunum saman og skrópuðu jafnvel í fyrirlestur meðan þeir vöfruðum um sýndarheima í textaformi. Í einhverjum tilvikum held ég að þetta hafi frestað útskrif um einhver ár. Svo eyddi fólk miklum tíma á ircinu eða í spjalli með talk, svona eins og gengur og gerist. Þetta var áður en messenger varð til.

Nú, fáeinum árum síðar^* spila nemendur ekki mud í tölvuverinu heldur dunda þeir sér í tölvuleikjum og á Facebook í miðjum fyrirlestri. Ég verð að játa að ég missti næstum andlitið þegar ég sá að náunginn við hliðina á mér í seinni fyrirlestri dagsins var að spila Eve online (varúð, myndband með hljóði fer í gang) nær allan tímann.

Ég held að mudið hafi verið skárra og ég held að mörgum myndi ganga betur í tímum ef þeir hefðu slökkt á ferðatölvunni.

^*Já, ég þjáist af afneitun. Nei, ég spilaði aldrei mud leiki. Eyddi aftur á móti alltof miklum tíma á netinu. Ég ætla svo ekki að rifja upp frásögur af þeim sem eyddi ótæpilegum tíma í að safna klámi inni í Vetrargarði!