Prestsonurinn sem ritstýrir Fréttablaðinu situr á greinum sem henta ekki ríkiskirkjunni. Nú síðast birti hann ekki grein Jóhanns Björnssonar um Borgaralega fermingu á Norðurlandi. Ég veit persónulega um tvær aðrar greinar sem trúleysingjar hafa sent Fréttablaðinu undanfarið en ekki fást birtar þrátt fyrir að tengjast umræðu sem í gangi er í blaðinu. Ein grein hefur þó ratað í blaðið. Hugsanlega var prestsonurinn ekki í vinnunni þá dagana.

Á sama tíma mega krúttlegu presthjónin Árni og Kristín varla leysa vind án þess að það endi með pistli sem birtist á leiðarasíðu prestsonarins. Aðrir prestar og guðfræðinemar fá skrif sín birt nær samdægurs í blaðinu án tillits til innihalds (Þessar greinar eru nær undantekningarlaust andlegt sorp, fullar af staðreyndavillum og útúrsnúningum).

Heimildarmenn mínir innan blaðsins segja að töluverðrar óánægju sé farið að gæta hjá mörgum í ritstjórn Fréttablaðsins sem blöskrar víst hve langt prestsonurinn gengur til að vernda hagsmuni ríkiskirkjunnar. Því miður þorir fólk ekki að ræða það opinberlega, enda ræður prestsonurinn öllu. Gerir sér ekki grein fyrir því að það hallar á hann í þessu máli, almenningur styður aðskilnað ríkis og kirkju. Sérstaklega frjálslyndir íslendingar, þeir sömu og eru sammála honum í evrópumálum.

Ég væri forvitinn að vita hvort það sé yfirlýst stefna eigenda Fréttablaðsins að styðja ríkiskirkjuna. Það væri heiðarlegast að fá það upp á borðið, við vitum að það er stefna Morgunblaðsins að vernda kirkjuna.

Það versta er að stundum kvarta ríkiskirkjuprestar útaf fjölmiðlum þegar þeir gerast svo grófir að segja fréttir af kirkjunni.