Það er ekki fréttnæmt að kirkjuráð vilji ríkiskirkjuna áfram í stjórnarskrá.

Kirkjuráð hefur sent öllum alþingismönnum og fulltrúum í stjórnlagaráði áskorun kirkjuþings þess efnis að ákvæði um þjóðkirkju verði áfram í stjórnarskrá.

Að sjálfsögðu verður ekki ríkiskirkjuákvæði í stjórnarskrá Ísland í framtíðinni. Hugmyndin er galin og hefur alltaf verið galin. Samt mun ríkiskirkjufólk senda erindi og pressa á þingmenn og því miður munu einhverjir þurfa að taka að sér að benda á hvað þetta er vitlaus hugmynd. Sjálfstæðisflokkurinn og Morgunblaðið munu styðja kirkjuna sem segir okkur í raun allt, er það ekki? Það er jafn gáfulegt að hafa ríkiskirkjuna í stjórnarskránni og að hafa Sjálfstæðisflokkinn þar. Það er fasistabragur af báðu.

Eins og oft hefur verið bent á, þá höndlar ríkiskirkjan ekki að hafa frumkvæði að framfaramálum, hún reynir að tefja, setja málin í umræðu og sakar andstæðinga um öfgar þegar þeir benda á andstöðu fulltrúa drottins. Svo kemur kirkjan eftir að öllu er lokið, sópar mótbárunum undir teppið og setur upp sparibrosið um leið og hún lýgur því að hún hafi alltaf stutt niðurstöðuna sem hún barðist gegn.

Þannig að þegar búið verður að fjarlægja ríkiskirkjuna úr stjórnarskrá, eins og meirihluti þjóðarinnar vill, mun ríkiskirkjufólk stæra sig af því að hafa alltaf viljað fullkomið jafnrétti og trúfrelsi á Íslandi.

Ég nenni þessari umræðu ekki en neyðist eflaust til að tuða um þetta næstu vikur.