Ég kom við í Bónus Holtagörðum á heimleið á föstudag og verslaði í kvöldmatinn fyrir föstudags og laugardagskvöld. Var búinn að ákveða að búa til pítsur á laugardag og greip poka af rifnum osti til að flýta fyrir mér.

Þegar ég tók pítsurnar úr ofninum í gærkvöldi sá ég að osturinn sem ég hafði keypt var alls ekki ostur.

Rifni osturinn bráðnaði ekki á pítsunum heldur lá þar í makindum og gerði grín að mér. Ég fiskaði pokann úr ruslinu og staðfesti enn og aftur fyrir sjálfum mér að ég er örviti.

Þarna blasir það við, í smá letrinu í fjórðu línu. "Pizzatoppur er næringarríkur rifinn jurtaostur". Af hverju er þetta ekki með stærsta letrinu? Af hverju heitir varan ekki einfaldlega Rifinn jurtaostur? Ég sá ekkert nema "Osta húsið" og "pizzuna" þegar ég greip pokann í búðinni.

Ég held að ástæðan sé sú að líkurnar á að örvitar eins og ég kaupi vöruna fyrir mistök eru miklu meiri ef því er ekki flaggað að þetta er ekki ostur í raun.

Það reddaði pítsunum að ég setti líka parmesan ost og dálítinn afgang af maribó osti með, gula klessan á pítsumyndinni er bráðinn maribóostur.