Örlítið hollráð til þeirra sem skrifa á vef. Þegar texti á vefsíðu inniheldur vísun er æskilegt að setja vísunina í texta sem tengist henni en ekki bara í eitt orð, sérstaklega ekki orðið "hér". Sjá t.d. hér! Mér finnst ég sjá þetta æ oftar.

Í greininni Ef þú ert ekki með okkur, þá ertu á móti okkur sem birtist á Kjarnanum eru frekar margar slíkar vísanir. Hér er dæmi:

Í Facebook-færslu sem nú er orðin að samhljóma pistli á Pressunni hjólar hann af miklu afli í Kjarnann, ásakar okkur um að ganga erinda og segir okkur hvað við ættum í raun að vera að gera. Pistilinn má lesa hér.

Betra væri að setja vísunina á viðeigandi stað.

Í Facebook-færslu sem nú er orðin að samhljóma pistli á Pressunni hjólar hann af miklu afli í Kjarnann, ásakar okkur um að ganga erinda og segir okkur hvað við ættum í raun að vera að gera.

Auk þess að færa vísun bætti ég texta við slóðina sem sést þegar bendill fer yfir. Annað dæmi úr sömu grein:

Í Kjarnanum sjálfum fann ég tvö dæmi. Annað er leiðari sem skrifaður var 9. janúar. Hann má lesa hér.

Þarna er vísunin sjálf reyndar ekki í lagi hjá kjarnanum. Ég lagaði hana, færði inn í textann og bætti við merkingu á eftir vísun til að ljóst sé að þarna er vísað á pdf skjal en ekki vefsíðu.

Í Kjarnanum sjálfum fann ég tvö dæmi. Annað er leiðari sem skrifaður var 9. janúar (pdf).

Það er læsilegra að setja vísanir inn í textann og auk þess betra fyrir leitarvélar. Í síðasta dæmi myndu einhverjir láta duga að hafa vísun á orðinu "leiðari" en mér finnst ágæt regla að hafa vísanir á fleiri en einu orði ef þau eiga við.

• w3.org: Don't use "click here" as link text