Það er maklegt og réttvíst að ganga Druslugönguna og vita að Jesús er með í för þegar við upprætum fordóma, dómhörku og ranglæti. #

Er Kristín Þórunn Tómasdóttir að atast í okkur? Hefur hún kynnt sér mannkynssöguna (þó það væri ekki annað en um Ísland fyrir 20-30 árum)? Hefur hún kynnt sér það sem er í gangi annars staðar í heiminum hjá (áköfum) fylgjendum Krists?

Það er ósmekklegt að nudda kirkjunni utan í druslugönguna^*. Ég hefði aldrei gert athugasemd við að kirkjufólk taki þátt í göngunni og styðji en grein Kristínar er tilraun til að hampa kirkjunni og kristni í tilefni dagsins. Kann þetta fólk ekkert að skammast sín? Engin tilraun gerð til að gera upp "syndir" ríkiskirkjunnar - og nógu mörg mál þekkjum við þar sem ríkiskirkjan hefur vegið illa að "druslum". Eigum við að rifja upp skólaheimilið Bjarg sem er eitt versta "slut shaming" Íslands á síðustu öld. Eigum við að rifja upp ástandið og hvernig einn vinsælasti biskup ríkiskirkjunnar tengdist því "slut shaming"? Eigum við að rifja upp biskupinn á undan núverandi biskup og biskupinn á undan honum (og biskupinn á undan honum)?

Það að leggja fram eitthvað jákvætt sem haft var eftir Kristi en sleppa því neikvæða og fordómafulla, er dæmigert fyrir grænsápu ríkiskirkjupresta.

En Jesús svaraði henni engu orði. Lærisveinar hans komu þá og báðu hann: „Láttu hana fara, hún eltir okkur með hrópum.“ Jesús mælti: „Ég er ekki sendur nema til týndra sauða af Ísraelsætt.“ Konan kom, laut honum og sagði: „Drottinn, hjálpa þú mér!“ Hann svaraði: „Ekki sæmir að taka brauð barnanna og kasta því fyrir hundana.“

^* Það hefði verið lítið mál að skrifar greinar á Vantrú í tilefni göngunnar en það var ekki gert. Ekki bara útaf krónískri leti heldur kom það aldrei upp, það datt engum í hug að misnota daginn. Mér finnst eiginlega ekki við hæfi að skrifa þessa bloggfærslu en það þarf að koma eitthvað mótvægi við áróður ríkiskirkjuprests.