Við hjónin skelltum okkur í bíltúr og gærkvöldi og enduðum á Gróttu vegna þess að ég gleymdi að beygja. Það var fjara og við röltum út að vitanum. Ég verð að játa, með dálítilli skömm, að þetta er í fyrsta sinn sem ég fer út á Gróttu.

Mér þótti gaman að sjá hvað ástandið á húsunum er gott en er ekki ráðgert að nota íbúðarhúsið fyrir eitthvað - það stendur tómt?

Þegar á leið og sólsetur nálgaðist má segja að fólk hafi þyrpst á svæðið, bílastæðið fullt og allir með myndavélar á lofti. Við létum okkur hverfa.

Það kom mér skemmtilega á óvart hvað hægt er að taka þokkalegar myndir með farsíma (LG G6), sérstaklega þegar maður hefur fulla stjórn á stillingum. Ég tók reyndar ekki raw skrár, þarf að kynna mér það aðeins og sjá hvort ég geti opnað þær með einhverju myndvinnsluforriti. Ég er ekki að segja að síminn komi í staðin fyrir alvöru myndavél, en með gleiðlinsu, manual stillingum og raw skrám er þetta alveg sæmilegasta tæki til að taka myndir. Ég er sérstaklega hrifinn af gleiðlinsunni og nota óspart. Finnst miklu meira vit í að nota aukamyndavélina, þegar símar eru með tvær, sem gleiðlinsu heldur en portrait (aðdráttar).

Nú hef ég semsagt nokkuð oft hjólað framhjá Gróttu en aldrei áður rölt út að vita. Þarf augljóslega að vera miklu duglegri við að vera "ferðamaður" á höfuðborgarsvæðinu.