Var mættur í Smárann um hálf tólf. Fékk stæði nálægt inngangi og þurfti ekki að bíða í röð. Byrjaði á að sótthreinsa kerruna og sjálfan mig og fór svo skipulega í verkið, innkaupin tóku samt um hálftíma! Fólk reyndi að hafa bil á milli í búðinni en það gekk misvel, sérstaklega í mjólkur-/kjötkælinum. Annars virtust nú allir þokkalega afslappaðir og brosmildir. Tveggja metra bil var virt í röðinni að kassa og starfsmaður beið með að byrja á næsta þar til ég var búinn að fjarlægja allar mínar vörur, sem tók ekki langan tíma enda ég ofurskipulagður!

Hér í Bakkaseli er því nóg til af mat. Kjallarabollur í hádegismat og Bónus lasagna í kvöldmat (það er fínt, við höfum það reglulega í matinn).

Gyða fór út í göngutúr meðan ég kláraði vinnudaginn, hún byrjaði að vinna klukkutíma á undan mér. Engin hreyfing hjá mér í dag.

Bjartsýnismælirinn á svipuðum stað, þó það vekji auðvitað ugg þegar fólki fjölgar í öndurvélum á gjörgæslu.