Er að skoða kílómetragjaldið aðeins.

Áætlunin (og reikningur) fyrir akstur á jeppanum í janúar er ansi langt frá notkun, rúmlega tvöfalt hærri (991 - 450). Þegar ég skoða tölurnar passa þær við meðaltalið síðustu tvö ár, frá skoðun í júlí 2024 til skráningar á kílómetrum 2. janúar, 32km á dag.

Við keyrum að jafnaði minna en áður, ég hjóla nær alltaf í vinnuna og Gyða tekur oftar strætó en hún gerði. Janúar er auk þess frekar rólegur mánuður í akstri, sérstaklega þar sem við fórum ekkert í bústað. Í áætlun er ekkert gert ráð fyrir að að notkun sé breytileg eftir mánuðum/árstíð. Með tveimur bústaðaferðum hefði þetta verið nær lagi.

Ég hef ekki áhyggjur, ég skrái nýjar kílómetrastöður á morgun og þetta jafnast líklega næstu mánaðarmót.

Kom við í Costco bensínstöðinni á bakaleiðinni eftir að hafa sótt Ingu Maríu út á flugvöll (að skutla og sækja á flugvöll var 36% af akstri jeppans síðasta mánuð, það eru 42 km frá Bakkaseli að Leifsstöð), setti 60 lítra á bílinn (fyllti síðast 2. jan) og staðfesti með hugarreikning að nýja fyrirkomulagið er ódýrara fyrir okkur á Landcruisernum.