Mig langar í nýja myndavél. Gamla Olympus C-2000 vélin hefur enst vel, keypti hana haustið '99 - eftir að við týndum filmuvélinni okkar. Við áttum von á barni og einhvern vegin tókst mér að sannfæra Gyðu að það væri stórsniðugt að fjárfesta í rándýrri stafrænni myndavél. Ég held að þetta hafi verið mjög góð fjárfesting. Fékk vélina á ansi góðu verði, bara vélin kostaði rúmlega 100.000.- út úr búð þá en ég borgaði mun minna fyrir hana ásamt aukadóti; hleðslutæki og rafhlöðum, minniskorti, rafmagnssnúru og tösku. Þessi myndavél hefur enst vel, upplausin er ágæt og fín myndgæði. Hún er samt frekar hægvirk og takmörkuð að ýmsu leiti.

Ég hef verið duglegur við að taka myndir, við eigum þúsundir mynda en höfum fáar framkallað. Þegar okkur langar að skoða myndir setjumst við fyrir framan tölvuna og flettum í gegnum albúmin. Rosalega gaman að eiga mikið af myndum af stelpunum, geta séð hvernig þær hafa vaxið og þroskast.

Ég er ekki mikill myndasmiður, það verður seint sagt. Ég hef samt gaman af því að fikta og prófa mig áfram, hef stundum slysast til að taka ágætar myndir.

En mig langar semsagt í nýja vél og er farinn að líta í kringum mig. Það er ýmislegt sem draumvélin þarf að hafa. Einna helst langar mig í stafræna SLR myndavél, þær hafa verið ansi dýrar hingað til og í raun einungis fyrir atvinnumenn eða þá sem eiga sand af seðlum en eitthvað er að birta til í þeim efnum. Ég má ekki eyða mjög miklu í nýja vél en hef þá smá fjárheimild.

Ég hef verið mjög ánægður með vélina mína og er því dáldið spenntur fyrir nýjustu útgáfunni í þeirri línu, C-5060. Eitt af því sem þá vél prýðir er að stuttur tími líður frá því maður smellir af þar til myndavélin bregst við, það vill bera á þvi með stafrænar myndavélar að dálítill tími líður þarna á milli. Einnig er linsan á nýju vélinni ansi víð, þ.e.a.s. maður nær meiru á mynd - breiðari ramma en fæst með flestum öðrum stafrænum vélum, linsan er ekki jafn björt og í eldri módelum, þannig að maður þarf meiri birtu til að ná góðum myndum án þess að nota flass. Hún notar ekki sömu tegund af rafhlöðum og vélin mín, mér finnst það mikill kostur að geta keypt venjuleg AA batterí ef hleðslurafhlöðurnar tæmast eða gleymast. Auka rafhlaða í þessa vél kostar einhvern 5-10 þúsund kall held ég en á móti kemur að það er víst hörkuending á þessum rafhlöðum. Maður verður að eiga tvö sett af hleðslurafhlöðum.

Einn af þeim fítusum sem ég vill endilega hafa er vídeó upptaka - vélin mín gefur ekki kost á því og við söknum þess að geta ekki tekið upp smá myndbandskeið af stelpunum. Ég tími ekki að kaupa mér sér vídeótökuvél, myndi aldrei nota hana það mikið. Olympus C-5060 vélina tekur víst nokkuð góð videó í upplausninni 640x480 - 15 rammar á sekúndu með hljóði svo lengi sem pláss er á minniskorti.

Ég er dáldið spenntur fyrir nýju Canon vélinni, EOS 300D, þarna er komin SLR myndavél á frekar sanngjörnu verði, kostar rétt rúmlega 100.000.- með linsu hér á landi. Ég hef ekki fjárheimild fyrir slíkri upphæð en get kannski fengið einhvern til að kaupa hana fyrir mig í útlöndum. Ég held að fyrir svona áhugamenn eins og mig geti þetta verið spennandi kostur. Eini gallinn sem ég sé við þessa vél er að ég held að það sé ekki hægt að taka vídeóbúta á hana en þarna erum við náttúrulega komnir með myndavél í hendurnar. Maður getur haft töluvert mikla stjórn á myndatökunni og fiktað í flestum stillingum.

Ég ætla að skoða þetta aðeins betur - sjá hvað hentar mér. Hvort ég eigi að halda mig við sömu línu eða að fá mér meiri myndavél.