Keypti þessa bók í fríhöfninni á leiðinni út og kláraði í fluginu heim.

Eric Schlosser, höfundur bókarinnar er þekktastur fyrir bók sína, Fast Food Nation - þar sem hann gagnrýnir skyndibitabransannn en ég hef ekki enn lesið þá bók.

Bókin Reefer madness and other tales from the american underground skiptist í þrjá hluta.

Í fyrsta hluta bókarinn er fjallað um stríðið gegn maríjúana. Schlosser tekur dæmi sem sýna út í hvaða vitleysu sú barátta er komin og að fórnarlömb stríðsins eru mun fleiri en fórnarlömb maríjúana sem er að mati ýmissra sérfræðinga sárasaklaust vímuefni (aðrir sérfræðingar eru á öndverðri skoðun).

Annar hluti bókarinnar fjallar um ólöglegt vinnuafl í ávaxta/grænmetisbransanum í Kaliforníu. Ólöglegir innflytjendur frá Mexíkó vinna við slæmar aðstæður og bág kjör, meðal annars við að tína jarðaber. Schlosser gagnrýnir í það hvernig reglur eru brotnar og fyrirtæki sem misnota þær hafa náð að bola út öðrum. Hann bendir á hvernig ólöglegir innflytjendur eru orðnir nauðsynlegir fyrir þennan bransa - allt er gert til að lækka kostnað, vinnuaðbúnaður og fleira skiptir engu máli.

Í þriðja hluta er fjallað um klámbransann og sér í lagi klámmógulinn Reuben Sturmann sem á tímabili stjórnaði lang stærstum hluta klámbransann í Bandaríkjunum og Evrópu. Bent er á mörg dæmi þess hvernig hinn móralski meirihluti hefur beitt ýmsum bolabrögðum í stríðinu gegn klámvæðingunni með engum árangri.

Boðskapur Schlosser er sá að ríki eigi að skipta sér minna af einkalífi náungans en að sama skapi eigi að setja strangari reglur (eða fylgja eftir þeim sem þegar eru til staðar) um starfssemi fyrirtækja. Óheft markaðslögmál leita alltaf að því að lágmarka kostnað, þ.m.t. laun, án nokkurs tillits til aðbúnaðs starfsmanna.

Bókin er góð, Schlosser er skemmtilegur penni og ítarefni aftast í bókinni bendir til þess að vandað sé til verka. Mér þykir það samt ákveðinn löstur á henni að þrír hlutar hennar tengjast ekki nógu sterkt. Fyrsti og síðasti hlutinn, um maríjúana og klámbransann, eiga heima saman í bók en kaflinn um erlent vinnuafl í jarðaberjabransanum tengist ekki vel að mínu mati.