Rölti í hádeginu yfir í gettóið til að kaupa mér eitthvað í matinn. Mætti ungum manni í gallajakka og gallabuxum sem teigaði síðustu dropana úr hálfs líters dós af ódýrasta bjórnum úr Ríkinu. Henti svo dósinni í runnana hjá apótekinu. Ég velti því fyrir mér að kalla á eftir honum en hætti við, maður styggir ekki svona fólk.

Röðin til Dóra sósukokks náði fram á göngugötu - ég hef lítið gert af því að versla í matinn hjá þeim fræga ræðusnilling.

Keypti mér eggjasamloku í Nettó og kom við hjá harðfiskborðinu á göngugötunni á bakaleiðinni. Keypti poka af rifinni ýsu á þúsund kall. Konan tók ekki við korti, ég fór því í hraðbankann. Á undan mér voru tvær eldri konur, held þeim hafi þótt óþægilegt að hafa mig fyrir aftan sig. Ég er órakaður. Þessa vikuna.

Borða hádegismatinn við skrifborðið, eins og svo oft. Harðfiskur í desert. Lyktin læðist um opið vinnurýmið, ærir suma.