Skaust í Dressmann og keypti mér gallabuxur. Ekki frásögum færandi en það gildir reyndar um flest sem ég skrifa í þetta blogg. Verslaði mér tvennar buxur - vafalítið ekki gáfulegt í ljósi þess að útsölur hefjast í næstu viku enda verð ég seint talinn gáfaður.

Það var myndarleg röð að kassanum í Dressmann, myndarleg röð í Pennanum/Eymundsson líka. Ansi margar búðir lokaðar.

Meðan ég beið eftir mátunarklefanum í Dressmann blöstu þessir hauslausu herramenn við mér, mér fannst eitthvað öfugsnúið við annan þeirra og smellti af mynd með gemsanum.

Hlustaði á tónlist með símanum í Smáralind þó enn sé ég bara með örlítið minniskort, blastaði RATM meðan ég rölti um. Regin var að segja mér að hann hefði gert þetta í Bónus um daginn og þótt það merkileg upplifun, ég tek undir það - maður er óskaplega mikið í eigin heimi.

Kom við í Nóatún og keypti mér samloku og sódavatn. Var næstum búinn að grípa mér langloku með kalkún en hætti við á síðustu stundu, það hefði bara verið of mikið. Lækkaði ekkert í tónlistinni í þetta skiptið, eru þessi samskipti við afgreiðslufólk ekki það stöðluð - þarf maður að heyra hvað þau segja? Ég veit ekki, kannski er þetta dónaskapur.