Ákvað að henda inn nokkrum handahófskenndum punktum varðandi starf og starfsánægju í kjölfar umræðu um þessi mál. Var búinn að taka saman punkta fyrir nokkru og var með á draft, tók þetta svo saman í nótt.

Þetta er lifandi skjal, breytist og aðlagast með tímanum. Ég mun pottþétt bæta við nokkrum atriðum og endurorða hlutina. Ekki væri verra að fá athugasemdir og uppástungur.

Að sjálfsögðu miðast þetta að einhverju leyti við hugbúnaðargeirann, sem er sá geiri sem ég hef starfað í síðustu sjö ár, en að megninu til eru þetta almennar pælingar.

Laun

Þegar komið er upp fyrir ákveðnar tekjur skipta laun ekki svo miklu máli að mínu mati. þegar fjölskyldan hefur það gott er það ekki úrslitaatriði hvort það munar einhverjum þúsundum á launum. Eiginlega skiptir samanburður á launum meira máli. Maður getur verið sáttur við launin sín en ósáttur ef aðrir í kringum mann hafa meira! Aftur á móti getur það haft eitthvað að segja ef miklu munar á launaboðum. Það veldur einnig fljótt óánægju ef aðrir hópar eru að hækka en maður sjálfur stendur í stað, jafnvel þó maður hafi ekki verið svo ósáttur við kjör sín áður.
Eru launin að hækka í takt við verðbólgu og opinber gjöld. Á tímum stöðugra skattahækkana (sveitarfélaga) lækka kjör í raun ef ekkert annað gerist.

Föst laun / yfirvinna

Það er mismunandi hvort yfirvinna er greidd eða ekki og oft getur munað ansi miklu um það. Þó grunnlaun séu tugþúsundum hærri er það fljótt að hverfa ef gert er ráð fyrir að unnin sé yfirvinna sem ekki er greidd aukalega.

Önnur fríðindi

Internettenging, gsm sími og þess háttar er kannski ekki mjög dýrt per se en þegar allt er talið saman getur munað tugþúsundum á tekjum fyrir skatta.

Hlutabréf

Fyrir nokkrum árum var aðal málið að fá sem best hlutabréfafríðindi, rétt til að kaupa bréf í fyrirtækinu á lágu gengi. Í dag er þetta liðin tíð og skiptir mig persónulega ekki máli. En það getur þó verið þreytandi að hlusta á kollegana lýsa því hve mikið þeir hafa grætt á síðustu gengishækkunum á markaði :-)

Trygg laun

Það er lítið varið í að vera með góð laun ef þau eru ekki greidd út svo mánuðum skiptir, ég hef reynsluna af því.

Atvinnuöryggi

Þegar maður er kominn með fjölskyldu er óvissa í þessu málum það síðasta sem maður vill lenda í. Það er því mikilvægt að atvinnan sé trygg, fyrirtækið sé í traustum málum og staða manns sé góð innan þess.

Vinnutími

Það munar miklu um að hafa sveigjanlegan vinnutíma, a.m.k. fyrir mig. Aðrir kunna vel við fastan tíma. Sveigjanlegur tími þar sem maður þarf einungins að skila sínum tímafjölda og vera á staðnum á ákveðnu tímabili, t.d. milli 10-16 á einkar vel við mig. Auk þess finnst mér afar gott að geta skotist úr vinnu, t.d. til að fara í ræktina um miðjan dag og unnið það upp.
Einnig skiptir máli hvort gert er ráð fyrir yfirvinnu, hvort það sé normið á vinnustaðnum að menn eyði þar öllum stundum og því í raun óskrifuð krafa að allir hangi þar frekar en heima hjá sér. Sérstaklega getur þetta átt við um staði þar sem stór hluti starfsmanna er ekki fjölskyldufólk. þegar maður er kominn með fjölskyldu hefur maður ekki mikla löngun til að eyða öllum kvöldum og helgum í vinnunni. Sérfræðingar þurfa að búa við að taka vinnuna með sér heim og að mínu mati er það ekki vandamál. Aftur á móti getur verið erfitt að vera á stöðugri bakvakt, en fylgir stundum.
Afar mikilvægt að menn geri sér grein fyrir því að langtíma crunch er bull.

Verkefni

Það skiptir miklu máli með starfsánægju hvernig verkefni maður er að fást við. Það gengur allt mun betur ef áhuginn er fyrir hendi. Að sjálfsögðu er veruleikinn þannig að oft þarf maður að gera meira en bara það sem er bráðskemmtilegt, en ef allt er hundleiðinlegt held ég að maður ætti að huga að því að skipta um starfsvettvang. Einnig er mikilvægt að verkefni séu næg, þetta tengist því að sjálfsögðu að fyrirtækið sé í traustum rekstri, en líka því að maður sé ekki að dólast of mikið. Það bendir til þess að maður sé ekkert alltof ánægður í starfi.. Einhæf verkefni eru ávísun á óánægju, ef maður er sífellt að gera sama hlutinn verður dagurinn langur. Fjölbreytt verkefni tryggja það líka að maður lærir eitthvað nýtt.

Viðskiptavinirnir

Hvernig eru kúnnarnir? Fær maður frið frá þeim eða er maður stöðugt að sinna þjónstu sem betur færi að aðrir sinntu. Er fyrirtækið í þeirri stöðu að geta hafnað vondum verkefnum.

Vinnubrögð

Er hægt að haka við margt (eitthvað) á þessum lista?
Það þarf að gera hlutina þannig að maður geti verið þokkalega stoltur af þeim. Ef sífellt er verið að skítamixa aukast líkur á óánægju í starfi töluvert. Lesa menn sér til í fræðunum, hafa samstarfsmenn áhuga á því sem starfið snýst um eða er þetta bara 9-5 hark.

Hefur maður eitthvað að segja

Þegar maður telur sig hafa þekkingu á því sem verið er að gera getur verið svekkjandi ef ekki er tekið mark á því sem maður segir. Sérstaklega ekki þegar maður telur sig geta fært rök fyrir því af hverju þurfi að gera hlutina á annan hátt.

Stemming

Yfirmenn

Stjórnendur skipta máli, sérstaklega lélegir stjórnendur. Kjörin, starfsumhverfið og verkefnin skipta afar litlu máli ef stjórnendur er asnar. Sem betur fer er það afar sjaldgæft. Hafa næstu yfirmenn mikil áhrif eða eru þeir bara peð í stærra tafli, geta þeir lagað það sem þarf eða þurfa þeir að leita annað og hversu löng er sú boðleið.

Vinnufélagar

Maður eyðir meirihluta tímans í vinnunni þannig að félagsskapurinn skiptir að sjálfsögðu máli. Auðvitað á þetta ekki að vera eins og félagsheimili, en ef maður á ekki ágæta kunningja í vinnunni er tryggt að manni líður ekkert sérstaklega vel.

Utan vinnu

Hluti af því er að gera eitthvað saman utan vinnu. Reyndar veit ég ekki hversu miklu máli þetta skiptir. Auðvitað hefur hópurinn gott af því að gera eitthvað saman af og til og þetta getur bætt stemminguna á vinnustað - en maður þarf að passa sig á að eiga líka félagslíf utan vinnu.

Kaffi og matartímar

Það getur skipt ótrúlega miklu máli hvernig stemmingin er í kaffi og matartímum. Er maður hluti af hópnum eða ekki, er hóað í mann þegar hópurinn fer í mat eða þarf maður að troða sér með. Er auðvelt að komast inn í hópinn þegar maður byrjar, kemur einhver og lætur manni finnast maður vera velkominn. Getur maður rætt um boltann, áhugamálin, fjölskylduna.

Starfsumhverfi

Hvernig er aðstaðan. Er vinnurýmið opið eða lokað. Einn stór geimur eða skipt niður í minni svæði. Er þokkalegt næði eða stöðugt skvaldur. Getur fólk rætt saman án þess að trufla alla aðra.
Hvernig er tækjabúnaður, eru tölvur up2date, skjáir góðir, skrifborð góð, stólar góðir.
Hafa yfirmenn lesið Peopleware og hafa þeir einhvern skilning á því sem þar kemur fram. Ég er ekkert endilega að tala um einkaskrifstofur, hópherbergi geta verið ágæt - þar sem 3-4 deila herbergi og vel stúkuð rými eru betri en galopinn salur.
Er sturtuaðstaða á svæðin? Rosalegur lúxus að geta hjólað til og frá vinnu og þá er eiginlega nauðsynlegt að hafa aðstöðu til að skola af sér svitann.

Klæðnaður

Einn kosturinn við þann vettvang sem ég starfa við er að klæðnaður er í flestum tilvikum hversdagslegur. Ég held ég myndi ekki meika að vera í jakkafötum með bindi á hverjum degi, hvað þá ef ég þyrfti að raka mig á hverjum morgni :-)

Framtíðin

Er maður að vinna við eitthvað sem maður getur hugsað sér að gera til frambúðar? Getur maður unnið við það sama og ef ekki, tekur eitthvað við.

Staðsetning

Er vinnustaður nálægt heimili. Hve langan tíma tekur að fara til og frá vinnu, hvað með leikskóla, skóla og vinnustað maka. Hvað með ræktina.

Endurmenntun

Er gert ráð fyrir að maður geti leitað sér menntunar, er vinnustaðurinn tilbúinn að aðstoða við það, jafnvel greiða kostnað.