Ég fletti í gegnum Morgunblaðið meðan rakarinn snoðaði mig rétt áðan. Í Mogganum var fátt áhugavert þannig að ég var fljótlega kominn að íþróttakálfinum. Fletti strax að umfjölluninni um bikarleik helgarinnar, alltaf gaman að lesa meira um þann skemmtilega leik. En fjandakornið, Mogginn sló mig strax útaf laginu. Liverpool vann nefnilega ekki þennan leik, það var Chelsea sem tapaði honum. Chelsea vinnur ekki tvöfalt var fyrirsögn blaðsins.

Það er gjörsamlega óþolandi að lesa svona íþróttafréttir. Það vita allir sem sáu þennan leik að sigur Liverpool var fullkomlega verðskuldaður og hefði eiginlega átt að vera stærri. Það vita líka allir sem sáu leikinn að væl Chelsea manna um ósanngjarna dóma er fullkomið kjaftæði. Þetta var brot á John Terry þegar aukaspyrnan var dæmd sem Liverpool skoraði úr. Sjálfur varð hann æfur nokkrum mínútum áður þegar Crouch braut á honum á nákvæmlega þennan hátt. Það var líka brot þegar John Terry skoraði, hann setti hendurnar á axlir varnarmannsins.

Næst þegar Liverpool vinnur Chelsea á sannfærandi hátt í bikarleik mælist ég til að Morgunblaðið prófi aðrar fyrirsagnir, t.d. Liverpool hafði betur, Liverpool komnir í úrslit eða jafnvel Sannfærandi sigur Liverpool.