Fórum á Ban Thai með matarklúbbnum í gærkvöldi. Ég hef aldrei farið þangað áður og var því nokkuð spenntur, hafði heyrt bæði góðar og slæmar umsagnir um staðinn. Við sátum í tvískiptri stofu á efri hæð, milli stofuhluta var létt skilrúm. Í hinum hlutanum var afar hávær kvennahópur. Mikið óskaplega geta sumar konur skrækt.

Við pöntuðum forrétt, Gyða fékk sér svínakjöt á spjóti, ég fékk mér nautakjöt með tígrasósu minnir mig að það hafi heitið, afar góð blanda af kóríander og myntu meðal annars.

Ég pantaði afar sterkan aðalrétt, lambakjöt með frumskógarsósu, þjónninn varaði mig við en ég lét mig hafa það. Maturinn var afskaplega hressandi. Drakk tvo stóra (630ml) bjóra með matnum til að kæla mig en þetta var æðislegt. Mér finnst gaman að borða sterkan mat og var víst orðinn ansi rauður í framan. Við smökkuðum öll alla rétti og þetta var allt bragðgott, Gyða fékk sér svínakjöt í engifersósu, frekar bragðmildan rétt.

Verðlag á Ban Thai er afskaplega sanngjarnt, réttirnir eru á bilinu 1500-2000 krónur og ég hef hvergi séð jafn ódýrt léttvín á veitingastað hér á landi. Margar flöskur á vínseðli á milli tvö og þrjúþúsund krónur. Þarna er semsagt hægt að gera vel við sig í mat og víni án þess að fara á bömmer þegar greitt er fyrir herlegheitin.

Ég er semsagt afskaplega sáttur með Ban Thai, fínn matur, þjónusta var nokkuð góð og verðlag til fyrirmyndar.