Ég er dauðuppgefinn eftir eldamennsku dagsins. Það tekur virkilega á að standa í eldhúsinu í marga tíma. Ekki það að ég vorkenni mér, Gyða sá um allt annað, tók til og þreif, pakkaði gjöfum, baðaði stelpurnar, og klæddi þær. Ég slapp í raun afskaplega vel.

En í stað þess að fara í bælið sit ég í stofunni og klára rauðvínið, dálítið hífaður. Það er eitthvað svo notalegt að hafa ró í húsinu, allt stress búið og ekkert fór úrskeiðis. Matur heppnaðist afskaplega vel, allir voru ánægðir. Kvöldið var notalegt og stresslaust. Súkkulaðikakan sem Gyða bakaði var dúndur, algjör súkkulaðisprengja. Fæ mér meira á morgun með vanilluís. Þetta er svona súkkulaðikaka sem maður verður að borða í litlum skömmtum, æði.

Ég þarf að kaupa mér aðra svona viskí flösku, hún er næstum búin. Gestir hafa nær undantekningarlaust verið afskaplega hrifnir af þessu (Óli Gneisti er undantekning, en það er lítið að marka hann í þessum málum :-) ) Ég keypti þessa flösku fyrir rúmum tveimur árum held ég, í fríhöfninni á Heathrow. Annars er ég ekki viss. Pabbi vildi meina að þetta væri eitt besta viskí sem hann hefur drukkið. Viti menn, það fæst í Ríkinu. Bushmills flaskan mín er líka að tæmast, þetta er agalegt ástand. Eina viskíið sem ég á eftir er óttalegur ruddi.