Ég fór út í pollagallanum rétt áðan og tæmdi gluggagatið eftir að byrjað var að flæða inn. Endurhannaði fargið mitt aðeins og vona að það dugi eitthvað betur. Ég vaki eitthvað frameftir, gægist út um gluggann og fer út að ausa eftir þörfum, fylgist vandlega með úrkomuspánni.

Fórum í mat til foreldra minna í kvöld. Fengum afar góða fiskisúpu sem bróðir minn útbjó í forrétt, frábæra Wellington nautasteik í aðalrétt (pabba fannst honum hafa eldað aðra steikina of mikið, það gerði ekkert til, báðar voru góðar) og franska súkkulaðiðköku og ís í desert. Fórum lítið út að skjóta flugeldum, Þórður bróðir minn kveikti í einni tertu í garðinum. Horfðum á skaupið sem mér fannst bara ansi gott.

Stelpurnar voru orðnar ansi þreyttar undir það síðasta og ég hélt á Ingu Maríu sofandi upp í rúm. Við máttum ekki koma seinna heim, annars hefði allt verið á floti í dótaherberginu.

Ég er að spá í að ná mér í smá 70% suðusúkkulaði og kjamsa á því. Maður verður að byrja árið þokkalega :-) Er líka að prófa að skella myndböndum á klassíska ipodinn, byrja á samtali Jonathan Miller og Arthur Miller um trúleysi.

Gleðilegt nýtt ár. Megi það vera þokkalega sæmilegt hjá okkur flestum. Ég held það sé óþarfa bjartsýni að fara fram á meira.