Ég legg til að stjórnvöld geri eitthvað til að ýta undir viðhald húsnæðis. Ef margir húseigendur láta ditta að húsnæði næsta sumar yrðu það væntanlega mannaflsfrekar framkvæmdir þegar allt er tekið saman. Hætt er við því eins og staðan er í dag að stór hluti slíkra framkvæmda verði greiddur undir borðið. Hingað til hefur umræðan fyrst og fremst snúist um viðhald á húsnæði í eigu hins opinbera og þar með bein útgjöld ríkissjóðs en að mínu mati er skynsamlegt að hvetja til viðhalds á húsnæði almennings.

Stjórnvöld geta gert a.m.k tvennt:

• Skattaívilnanir: fellt niður vsk og hugsanlega önnur gjöld á slíkar framkvæmdir tímabundið
• Lánaívilnanir: veitt hagstæð lán til slíkra framkvæmda sem væru t.d. án afborgana fyrsta árið.

Markmiðið er að framkvæmdir séu uppi á borði og þeir sem við þær vinna séu ekki á atvinnuleysisskrá. Einnig viðheldur fólk verðmæti fasteigna og vegur vonandi eitthvað upp á móti lækkandi fasteignaverði.

Að sjálfsögðu eru allir ekki í þeirri stöðu að geta farið út í framkvæmdir en fjölmargir eru það. Sérstaklega ef stjórnvöld létta undir bagga.

(smáa letrið: Ég þarf að fara í framkvæmdir á árinu.)