Af öllum bloggprestum sem gerst hafa sekir um siðferðis- og lögbrot er séra Svavar Alfreð í uppáhaldi hjá mér.

Í dag bloggar hann um óþjóðalýð:

Sumir sjá fyrir sér heim án þjóða. Engin landamæri. Eina menningu. Ein trúarbrögð. Eina tungu.

Eru sumar myndir svonefndrar fjölmenningarhyggju kannski í raun slík einmenningarhyggja?

Mér varð hugsað til Biblíunnar og skrifaði komment úr Matt 28:

¹⁸Og Jesús kom til þeirra, talaði við þá og sagði: „Allt vald er mér gefið á himni og jörðu. ¹⁹Farið því og gerið allar þjóðir að lærisveinum, skírið þá í nafni föður og sonar og heilags anda

Svavar svarar og vitnar í Jesaja 11:

⁶Þá mun úlfurinn búa hjá lambinu og pardusdýrið liggja hjá kiðlingnum. Kálfur, ljón og alifé munu ganga saman og smásveinn gæta þeirra. ⁷Kýr og birna verða saman á beit, ungviði þeirra hvílir hvort hjá öðru, og ljónið mun bíta gras eins og nautið. ⁸ Brjóstmylkingurinn mun leika sér við holu nöðrunnar og barn, nývanið af brjósti, stinga hendi inn í bæli höggormsins. ⁹ Enginn mun gera illt, enginn valda skaða á mínu heilaga fjalli því að allt landið verður fullt af þekkingu á Drottni eins og vatn hylur sjávardjúpið.

Ég velti því fyrir mér af hverju hann byrjaði tilvitnun sína á sjötta erindi en ekki t.d. fjórða, hefði reyndar mátt vitna í kaflann alveg frá byrjun:

¹Af stofni Ísaí mun kvistur fram spretta og sproti vaxa af rótum hans. ²Andi Drottins mun hvíla yfir honum: andi speki og skilnings, andi visku og máttar, andi þekkingar og guðsótta. ³Guðsóttinn verður styrkur hans. Hann mun ekki dæma eftir því sem augu hans sjá og ekki skera úr málum eftir því sem eyru hans heyra. ⁴Með réttvísi mun hann dæma hina vanmáttugu og skera með réttlæti úr málum hinna fátæku í landinu. Hann mun ljósta ofbeldismanninn með sprota munns síns, deyða hinn guðlausa með anda vara sinna. ⁵Réttlæti verður belti um lendar hans, trúfesti lindinn um mjaðmir hans.

Önnur athugasemd mín bíður enn birtingar. Annars hélt ég að það væri ekkert að marka Gamla testamentið :-)

Hugtakið óþjóðalýður bætist við hugtakið umburðarlyndisfasisti sem kom frá hinum Akureyrarklerkinum. Svo eru það trúleysingjar sem eru sífellt sakaðir um skítkast :-)

En vandamálið frá mínum bæjardyrum er semsagt það að ríkiskirkjufólk sér ekki skortinn á umburðarlyndi og tillitssemi sem það stendur sjálft fyrir. Hvað er hægt að kalla trúboð í leik- og grunnskólum annað en skort á umburðarlyndi og tillitssemi? Hvað er hægt að kalla ríkiskirkjufyrirkomulagið annað en skort á umburðarlyndi fyrir þeim sem ekki aðhyllast kristni? Ríkiskirkjuliðið vitnar í hefðir til að verja fordóma sína og yfirgang en væri ekki nær að iðka einfaldlega það sem þau prédika?

³Hví sér þú flísina í auga bróður þíns en tekur ekki eftir bjálkanum í auga þínu?

Hættið að rembast við að kristna allan heiminn. Ekki vera óþjóðalýður.