Séra Þórhallur Heimisson er magnaður náungi.

Honum var boðið á Þjóðfund og tókst að sjálfsögðu að troða trú sinni að. Niðurstaða fundarins samkvæmt Þórhalli er svo ótvíræð að hann bloggar um hana tvisvar. Seinni bloggfærslan er svona (án litafyllerís):

Kristin trú og þjóðleg menning eru undirstaða þess að hér sé hægt að byggja heiðarlegt samfélag, ef marka má niðurstöðu Þjóðfundar.

Eða eins og segir þar undir liðnum TÆKIFÆRI:

Þjóðleg menning, kristin trú, agað og heiðarlegt samfélag móti land tækifæranna....

Ekki get ég annað en fagnað þessu eins og allir hljóta að gera sem vilja að framtíð landsins sé byggð á kletti en ekki sandi eins og hingað til

Við vitum hver vísunin í klettinn er en skoðum málið örlítið nánar. Á heimasíðu Þjóðfundar er hægt að sjá níu liði og í hverjum eru 17-19 atriði talin upp. Hér er allt sem talið er upp undir liðnum tækifæri, þar með talið það sem Þórhallur telur upp rauðlitað.

• Ísland í alþjóðasamfélagi verði táknmynd friðar og umburðarlyndis. Íbúum dreifbýlis tryggt réttlæti og þjóðin líti glöð til nýs Íslands.
• Bjartsýn, kröftug, sjálfstæð þjóð meðal þjóða í vel reknu samfélagi, þar sem allir njóta sömu tækifæra og þar sem frelsinu fylgir ábyrgð.
• Friðsöm fyrirmyndarþjóð með sterka sjálfsmynd í landi jafnræðis og hamingju. Tekur þátt í alþjóðasamstarfi af heilindum, með full yfirráð yfir auðlindum.
• Heiðarlegt og ábyrgt samfélag sem tekur mið af virðir og sameinar reynslu og þekkingu sína og annara þjóða.
• Ísland er auðugt af menningu og listum, það er aðili að esb og auðlindir eru í almannaeigu.
• Við erum ábyrg þjóð sem setur hagsmuni heildarinnar í öndvegi, þróum gagnsæi í nýrri stjórnarskrá, þar sem stjórnskipan endurspeglar virðingu fyrir öllu lífi.
• Íslendingar vilja taka ábyrgð og læra af reynslunni en jafnframt standa saman með bjartsýni, heiðarleika og von að leiðarljósi.
• Heilbrigt, heiðarlegt og réttlátt samfélag í alþjóðlegu samstarfi, þar sem opin og upplýst umræða um þjóðfélagsmál þrífst og íslensk menning blómstrar.
• Sjálfstætt lýðræðisríki utan ESB með skýra framtíðarsýn sem byggir á frumkvæði, nýsköpun og krafti fólks sem ber ábyrgð á gjörðum sínum
• Að Ísland verði miðstöð friðar, sem lætur sig hag náungans varða og þar fari fram fordæmalaus umræða um esb.
• Bætt samfélag með skýra ábyrgð. Tilraunasamfélag með þróttmikla atvinnu- og nýsköpun sem endurreisir heiðarleika Íslands í samfélagi þjóðanna.
• Íslands stæði betur ef lífskjör bötnuðu og siðbót yrði. Það má gera með öruggri mynt, frjálsri fjölmiðlun og nægjusemi.
• Tækifæri þjóðarinnar byggjast á menningu og alþjóðasamstarfi, ábyrgri efnahagsstjórn og skynsamlegri nýtingu auðlinda til nýsköpunnar og framkvæmda, td rafbílavæðingar.
• Ísland er sjálfstæð þjóð utan ESB þar sem réttlæti, frelsi og ábyrgð eru höfð að leiðarljósi.
• Þjóðleg menning, kristin trú, agað og heiðarlegt samfélag móti land tækifærannna, þar sem umhverfismál og hátæknisjúkrahús við Ártúnshöfða hafa forgang.
• Ísland er sjálfstæð þjóð meðal þjóða, opið heiðarlegt samfélag með áherslu á nýsköpun og skapandi hugsun.
• Virkjum kraft og auðlindir þjóðarinnar til að tryggja okkur sess í alþjóðasamfélaginu með heiðarleika og lýðræði að vopni.

Þannig að 16 af 17 hópum sáu ekki ástæðu til að nefna kristna trú undir þessum lið en samt telur séra Þórhallur að "Kristin trú og þjóðleg menning [séu] undirstaða þess að hér sé hægt að byggja heiðarlegt samfélag, ef marka má niðurstöðu Þjóðfundar." Í hinum átta flokkunum (og a.m.k. 17 undirliðum við hvern) er einungis einu sinni minnst á kristna trú. Spurning hvaða prestur hefur þar setið við borðið. Þannig að ef þetta eru 9*17 atriði, samtals 153 punktar og kristin trú er talin upp tvisvar, þá er niðurstaða þjóðfundar ótvírætt (samkvæmt Þórhallslógík) sú að vægi kristinnar trúar sé svona 1.3%.

Er það ekki merkilegt að eina borðið sem telur ástæðu til að nefna kristna trú undir liðnum tækifæri skuli einmitt vera borðið hans séra Þórhalls?

Ég myndi gera athugasemd við þetta á bloggsíðu prestsins en hann lokaði á mig fyrir löngu án ástæðu.