Ég fór í frí eftir vinnu á mánudag í síðustu viku, við skelltum okkur í bústað um kvöldið og vorum þar fram á páskadag. Ég slakaði á, drakk dálítið öl og vín, át súkkulaði og var þokkalega góður við mig. Eina hreyfingin var örstuttur göngutúr á föstudaginn langa - til að minnast Frelsarans sem fór víst í göngutúr þann sama dag fyrir langa löngu.

Í hádeginu í dag skellti ég mér í fótbolta og nú er ég alveg búinn að vera, fékk verk í lungun og gott ef ég fann ekki fyrir svima. Gat ekki neitt, skoraði ekki mark nema þegar boltinn hrökk af mér án þess að ég vissi af því.

Lexían er sú að maður á ekki að fara í fótbolta strax eftir páskafrí.

Þess má geta að ég er ekki byrjaður á seinna páskaegginu mínu. Fékk tvö lítil, eitt dökkt sem ég er ekki búinn að snerta en hitt kláraði ég í gær.