Óskaplega er ástandið erfitt hjá ríkiskirkjunni þessa dagana. Prestarnir neita að spara jafn mikið og aðrir og reita fólk til reiði. Umfjöllun um (margvíslega og ítrekaða) kynferðislega misnotkun presta og annarra préláta kirkjunnar bætir ekki stöðuna.

Ég sé marga skammast í kirkjunni en það dugar skammt að tuða. Þetta er ríkiskirkjan ykkar, þið haldið henni uppi og stjórnmálamennirnir ykkar verja hana.

Fámennur hópur hefur í mörg ár reynt að benda á ruglið í kringum ríkiskirkjuna og fyrst og fremst uppskorið skítkast og dylgjur (sem er meira að segja kennsluefni við Háskóla Íslands).

Það sem ég vil segja við ykkur sem eruð ekki sátt við þessa blessuðu ríkiskirkju er einfaldlega: SKRÁIÐ YKKUR ÚR ÁRANS RÍKISKIRKJUNNI og gangið lengra en það, ræðið við fólk sem þið þekkið um að gera það sama. Ríkiskirkjan er og hefur alltaf verið þjóðarmein, sníkjudýr sem hangir á þjóðinni en þykist halda í henni lífi. Það þarf að skera hana af hratt og örugglega. Þetta er einfalt, það þarf ekkert að semja um jarðir eða slíkt. Setjið bara lög og látið kirkjuna éta það sem úti frýs. Drottinn sér um sína.

Auðvitað er fullt af fínu fólki starfandi í kringum blessaða kirkjuna en það skiptir ekki nokkru máli. Þetta fína fólk heldur áfram að vera til (og vonandi fínt), sumir munu áfram starfa hjá sjálfstæða og hógværa trúfélaginu sem tekur við af ríkiskirkjunni, aðrir munu finna sér nýja vinnu. Hafið ekki áhyggjur, Drottinn sér um sína.

Meðan mikill fjöldi fólks er skráður í þetta apparat geta formælendur kirkjunnar haldið því fram að þeir megi þetta og eigi þetta, eins og þeir gera reglulega þessa dagana, nákvæmlega eins og skrúðkrimmarnir - nákvæmlega eins.

Skráið ykkur úr ríkiskirkjunni. Það er eina leiðin til að flýta því að ríki og kirkja verði aðskilin. Stjórnmálamenn hafa ekki kjark til að gera neitt í þessu, kirkjan á peninga og hefur sterka lobbíista. Þetta verður að koma úr grasrótinni, frá fólkinu. Fleiri þurfa að hafa fyrir því að skrá sig og sína úr kirkjunni.

Margir þeirra sem hafa verið að blogga um kirkjuna hafa fyrir löngu sagt sig úr henni, þeir þurfa ekkert að taka þetta til sín. Ég hvet þá til að minna lesendur sína á að með því að vera meðlimur í ríkiskirkjunni er fólk beint og óbeint að styðja allt sem það apparat stendur fyrir.