Punktar um trúfélagsskráningu
- Það þarf að hafa í huga að í nýjustu tölum eru öll börnin sem sjálfkrafa skrást í ríkiskirkjuna við fæðingu. Enn á eftir að afgreiða lög um það mál á Alþingi.
- Biskupsmálið er vissulega ástæða þess að fólk drífur sig nú í að leiðrétta skráningu en ég held að langflestir af þeim sem hafa skráð sig utan trúfélaga hafi einfaldlega ekki átt neitt erindi í kristið trúfélag í langan tíma.
- M.ö.o. hefur trúfélagsskráning hér á landi ekki verið í nokkru samræmi við trúarviðhorf landsmanna.
- Kirkjunnar menn eru alveg meðvitaðir um þetta, þess vegna hafa þeir t.d. viljað koma í veg fyrir að þeir sem standa utan trúfélaga greiði lægri skatta sem nemur sóknargjöldum.
- Sóknargjöld eru ekki félagsgjöld sem ríkið innheimtir fyrir trúfélög heldur einfaldlega greiðsla sem ríkið greiðir úr sameiginlegum sjóðum landsmanna.
- Rafræna trúfélagsskráningin á eftir að verða gríðarleg bylting í þessum málum. Þetta er mikil framför og ég held að það muni koma á óvart hve margir nota þann kost.
- Nú þurfum við bara að fá upplýsingar um trúfélagsskráningu á skattframtal.
- Að sjálfsögðu á ríkið að hætta að halda skrá um trúfélagsaðild landsmanna. Auk þess á ríkið ekki að greiða sóknargjöld til trúfélaga, félögin eiga einfaldlega að halda félagaskrá og innheimta félagsgjöld. Af hverju á fólk ekki að geta verið skráð í tvö eða fleiri trúfélög ef það kýs? Hvað kemur það ríkinu við í hvaða trúfélag fólk er skráð?
- Ef allir landsmenn skrá sig úr ríkiskirkjunni mun samt fjöldi presta vera á launaskrá ríkisins. Hver hugsaði eiginlega um hag þjóðarinnar þegar samið var við ríkiskirkjuna? Björn Bjarnason?
Athugasemdir
Stefán Pálsson - 04/09/10 11:36 #
Það að trúfélagaskráning fylgi móður ætti nú reyndar ekki að skekkja hlutfallstölurnar. Því það þýðir einfaldlega að ef 10% þjóðarinnar standa utan trúfélaga, þá má búast við að 10% barna geri það líka.
Matti - 04/09/10 13:08 #
Það er rétt, en höfum í huga að vera má að móðir sé í trúfélagi en faðir ekki. Það virkar reyndar einnig í hina áttina. En ef við gefum okkur (sem ég geri) að trúfélagsskráning gefi ekki rétta mynd af trúarviðhorfum þjóðarinnar viðheldur sjálfkrafa skráning þeirri röngu mynd.
Svo geri ég ráð fyrir að mæður á barneignaaldri séu örlítið fleiri utan trúfélaga en landsmeðaltal segir til um, þar sem eldra fólk er frekar í trúfélagi en yngra fólk.