Þvílíkur lúxus! Tvær ruslatunnur þar sem ég bý, báðar fullar og samkvæmt dagatalinu þá verða þær tæmdar á mánudag í næstu viku. Skilvirkni.

Haha!

Þetta virðist vera regla hjá þeim. Hérna fáum við hálfa tunnu per íbúð, sem dugir nú ekki langt. Um daginn var svo flutt inn í ósamþykkta íbúð í húsinu sem staðið hafði auð auk þess sem íbúafjöldi í öðrum íbúðum í húsinu hefur aukist undanfarið. Tunnurnar eru oft orðnar hálffullar þegar búið er að setja í þær pokana sem þeir skilja eftir á gólfinu.

Við höfum ítrekað óskað eftir fleiri tunnum, meira að segja með formlegri ályktun húsfélagsins. Ekkert hefur heyrst frá borginni ennþá.

Endurvinna, endurvinna, endurvinna - við fækkuðum niður í eina tunnu fyrir okkar 5 manna fjölskyldu og svo mann sem býr einn uppi í risi.

Feikinóg. Fyllist aldrei. Enda hendum við engum pappír, engu járni né gleri, nánast engu plasti, aldrei gosumbúðum. Tekur ferð í Sorpu á tveggja til þriggja vikna fresti.

Sé fólk ekki til í þetta má athuga með að henda í lofttæmipoka sem fást í Rúmfatalagernum. Ruslið tæki talsvert minna pláss ;)

Ég held að ruslakarlarnir séu undir fyrirmælum um að taka bara tunnur. Þegar ég var ruslakerling á sumrin hér í denn þá gilti sú regla alla vegana. Ég held að það hafi verið vegna þess að einhvern tíman hafi verið teknir pokar sem ekki voru í tunnu og þeir voru víst ekki rusl. Ég held að hér sé því ekki við sjálfa öskukarlana að sakast, heldur reglur Hreinsunardeildar Reykjavíkurborgar (heitir hún það enn?).

Það getur verið erfitt að vera ruslakerling. Við vorum undir ströngum fyrirmælum að taka ekki tunnur ef þær innihéldu garða-úrgang, þ.e. gras. Þannig að við opnuðum alltaf tunnurnar til að passa upp á að þær væru ekki fullar af grasi, sérstaklega ef þær voru þungar. Einu sinni sem oftar gerði ég það og lyfti upp efsta pokanum sem maður jú gerði til að sjá hvort verið var að fela gras í tunnum. Íbúi hússins sá til mín og klagaði mig fyrir "bin-diving" :D

Verð að taka undir með Hildigunni. Við erum með eina græna tunnu (tæmd á 20 daga fresti) fyrir fimm manna fjölskyldu og dugir prýðilega. Það munar ótrúlega miklu að flokka plast og pappír og fara með í grenndargám. Tiltektum fylgir yfirleitt sorpuferð.

Bíddubíddubíddu, er ekki hægt að endurvinna thulekassann? Það hlýtur að vera hægt að nota eitthvað af þessu í jólaföndur!

jamm thulekassinn færi til dæmis í pappírsgáminn, einmitt.