Við hjónin skelltum okkur í Smárabíó í gærkvöldi að sjá Svartur á leik (Facebook veggur myndarinnar). Myndin hefur fengið gríðarlega góða dóma en sem betur fer sá ég líka a.m.k. eina neikvæða athugasemd áður en ég fór. Ef maður hefur of miklar væntingar standa bíómyndir sjaldan undir þeim.

Svartur á leik er að mínu mati mjög góð bíómynd. Það má svosem segja að söguþráðurinn sé dálítið samhengislaus, að myndin sé samansafn atvika sem persónunar hennar taka þátt í. Við fylgjum þó aðalsöguhetjunni gegnum myndina og mér þótti þetta virka vel.

Ég átti von á að myndin væri grófari. Fannst á umræðunni eins og hún væri eitthvað skelfileg og kynlífsatriði væru sérlega gróf. Ég er kannski orðinn svona dofinn og kippi mér ekki upp við neitt! Myndin er þó ekki við hæfi barna.

Myndin nær tíðarandum í kringum aldamótin vel enda ekki mjög langt hoppað aftur. Samt skemmtilegar vísanir, sumar lúmskari en aðrar. Það er ekki lengra síðan allir reyktu á skemmtistöðum! Það er áhugavert hvernig sagan er byggð í kring um raunverulega atburði.

Undirheimalífið er ekki gert eftirsóknarvert, þetta er allt hálf aumkunarvert í raun.

Svartur á leik er faglega gerð, myndtaka og hljóð kom vel út og tónlistin í myndinni skemmtileg. Leikurinn er sannfærandi. Var þetta ekki Viddi sem lék dómarann?

Ég mæli með myndinnni. Það var uppselt í Smárabíó í gærkvöldi. Við mættum 10 mínútum fyrir átta og fengum sæti á þriðja bekk. Myndin hófst ekki fyrr en rúmum 20 mínútum eftir auglýstan sýningartíma útaf auglýsingum og þegar um 45 mínútur voru liðnar kom hlé! Það er þó önnur umræða. Sleppti því að kaupa mér gos og popp í bíó. Sá ekkert eftir því!

• Áhugavert viðtal við leikstjórann (á ensku)