Ég eldaði saltfisk í saffranrisotto eftir uppskrift frá Vínótek í fyrrakvöld og rétturinn var frábær.

Við erum reglulega með saltfisk í matinn enda vinsælt að selja hann í styrktarsölu - við eigum því eiginlega alltaf útvatnaðan saltfisk í frysti. Ég elda saltfiskinn yfirleitt með hvítlauk, svörtum ólífum og tómat og ber fram með pasta. Ég er ekki frá því að þessi risotto réttur trompi það og verði oftar eldaður.

Ég var með stærri uppskrift, fiskflakið var 360 grömm þannig að ég notaði 500gr af grjónum og meira af mascarpone. Hef aldrei notað svona mikinn ost í risotto og sé nú hvaðan áferðin kemur á risotto á veitingastöðum - nóg af osti.

Ég skráði allt samviskusamlega í myfitnesspal meðan ég eldaði. 100gr af réttinum eru um 150 kaloríur. Skammturinn á myndinni, 400 gr, er því um 600 kaloríur. Ég fékk mér samt aðeins meira!

Ég mæli með þessari uppskrift, ef þið hafið eldað risotto er þetta ósköp einfalt og afar gott.