Mér er nokkuð sama um Dunkin' donuts, verð ekki tíður gestur. Drekk ekki kaffi og sleppi yfirleitt bakkelsi - er svo skrítinn að sætindi heilla mig lítið (ég stelst alveg í vínarbrauð ef það er fyrir framan mig).

Auðvitað er þetta bakkelsi fáránlega óhollt, það vita allir. Eitt hefur þessi ameríska keðja framyfir flesta íslenska staði. Það er hægt að nálgast upplýsingar um hitaeiningar og aðrar næringarupplýsingar fyrir allar vörurnar þeirra. Ef þið notuð myfitnesspal er allt þar inni. Ástæðan er að í sumum ríkjum Bandaríkjanna er skylda fyrir veitingastaðakeðjur að hafa þessar upplýsingar aðgengilegar.

Þannig að það er rétt, kleinuhringur frá Dunkin donuts inniheldur helling af hitaeiningum, fitu og sykri (sjá mynd), en það gerir líka kakan á Kaffi París og latteið hjá Te og kaffi. Munurinn er að við fáum engar upplýsingar frá þeim stöðum, þurfum að giska.

Mér finnst eðlilegt að upplýsingar um innihald og næringargildi matvæla séu aðgengilegar frá öllum sem selja veitingar. Það er ekkert flókið að setja slíkt saman ef maður veit hvaða hráefni fara í matinn. Og fólk þarf ekkert að vera að skrá allt mataræði niður eins og ég geri til að hafa gagn að þessu. Þeir sem hafa ekki áhuga á að vita hvað þeir setja ofan í sig sleppa því að kynna sér það - hinir fá tækifæri til þess.

ps. Ef þið verslið reglulega hjá Dunkin' donuts eða sambærilegum stöðum munið þið fitna. Þannig virkar það bara.