Mér finnst ekkert að þeirri þróun í raun en henni fylgir samt vandi. Í skipulagi var aldrei gert ráð fyrir að í hverju húsi væru margar fjölskyldur með marga bíla! Í Bakkaseli og víðar í Seljahverfi er orðið áberandi bílastæðavandamál. Seint á kvöldin er bílum lagt úti um allt, uppi á grasbölum, á gangstéttum og göngustígum.

Í vetur hefur fólk tekið upp á því að leggja sífellt á upphitaða gangstétt við göngustíginn upp að húsinu mínu í Bakkaseli. Þessir bílar þvælast oft fyrir og hafa pirrað mig óstjórnlega. Ég hef því tekið upp á því að setja miða undir rúðuþurrku þar sem ég bendi fólki kurteisilega á að þetta sé ekki bílastæði og bið það að leggja ekki þarna. Það virðist virka í flestum tilvikum en sumir virðast líta þannig á að þeir séu með einkabílastæði, eins og nágranni minn sem á bílinn á myndinni fyrir ofan. Hann kom heim rétt eftir miðnætti og lagði upp á gangstétt.

Vandinn er í raun ekki skortur á bílastæðum heldur fjöldi bíla. Það er ekki gert ráð fyrir rúmlega þremur bílum á hvert raðhús í götu eins og Bakkaseli og öðrum sambærilegum, þá færi alltof mikið svæði undir bíla og nóg er það fyrir. Hverju raðhúsi fylgir bílskúr, stæði fyrir framan skúrinn og eitt stæði að auki, þrjú stæði ef fólk er ekki með fullan skúr af drasli eins og við! Það er undantekning að fólk geymi bíla í skúrnum þannig í raun eru rétt rúmlega tvö stæði á hvert raðhús - en miklu fleiri bílar.

Vandinn er öll þessi bílaeign, fólk þarf einfaldlega að nota færri bíla og ef það leigir út kjallarann getur ekki fylgt því bílastæði nema fólk gefi sjálft eftir stæði í staðin.

Það er hægt að fjölga bílastæðum víða í Seljahverfi, t.d. við Seljabraut, en ég held að það sé ekki lausn. Fólk nennir ekki að ganga hundrað metra að stæði og þau myndu fljótt fyllast af númerslausum bílum, kerrum og vinnutækjum.

Lausnin er að ibúar taki þátt í kostnaði við bílastæðin í hlutfalli við fjölda bíla. Við erum með tvo bíla í dag, húsi nágranna míns fylgja fjórir bílar, í öllum húsunum á móti a.m.k. þrír! Ég borga jafn mikið fyrir framkvæmdir og snjóruðning á bílastæðinu - það er eiginlega glórulaust.

Þess má geta að það er frábært að taka strætó í Bakkaseli, tólfan og tvisturinn stoppa í tveggja mínútna göngufæri og fara beint í Mjódd þar sem hægt er að taka vagna í allar áttir. Að auki tekur ekki nema tuttugu mínútur að hjóla í Borgartún.