Það er augljóst að margir sem segja þetta hafa aldrei prófað slíkar samræður (eða eru kannski einfaldlega sammála). Þú getur bent á augljósar staðreyndir sem hrekja hugmyndir samsærissinna/rasista og það hefur ekki minnstu áhrif nema í algjörum undantekningartilvikum. Sköpunarsinnar verða áfram sköpunarsinnar jafnvel eftir að hafa klárað háskólanám sem hrekur allar þeirra bull-hugmyndir. Að þvæla um að „það megi ekki taka umræðuna“ er þreytandi rugl. Það má alveg taka umræðuna, en ef rök og staðreyndir hafa engin áhrif er umræðan tilgangslaus, og jafnvel verra, dreifir ruglinu. Það er ekki hægt að eiga umræðu ef annar aðilinn tekur ekki þátt í góðri trú.

Auðvitað reynum við fyrst að hrekja þvaður og benda fólki á að það fer með rangt mál en það þarf ekki nema nokkrar mínútur eða fáein tilsvör til að sjá hvort það er tilgangur með því. Ef það er tilgangslaust þá hættum við!

Spurningar

„En má ekki spyrja spurninga?“ segja aðrir og spyrja iðulega spurninga sem er búið að svara. Eins og þeir viti ekki að það er algeng áróðursaðferð að spyrja bara spurninga; „ertu hættur að berja konuna þína?“ „hvað ef gyðingar eru með áætlun um að skipta út hvíta kynstofninum?“, „er það satt að allir innflytjendur séu á bótum?“.

Siðlausir skíthælar

Það eina sem sannarlega virkar er að benda öðrum á að það sem þetta fólk er að segja er sturlað kjaftæði og það virkar vel harðort, þannig getum við hugsanlega takmarkað útbreiðsluna eitthvað. Það skiptir ekki máli þó rasistum sárni. Vandinn er að á sama tíma eru háværar raddir, eins og til dæmis Frosti Logason, Brynjar Barkarson eða Þórarinn Hjartarson hér á landi, eða Joe Rogan/Jordan Petersonn/Gad Saad svo við tökum stærra dæmi erlendis, að dreifa þessu kjaftæði gagnrýnislaust til að græða peninga því þetta eru siðlausir skíthælar.

Þess vegna meðal annars segjum við upphátt að rasistar séu rasistar og jafnvel stundum klikkaðir samsærissinnar; til að vega upp á móti áróðri og reyna að koma í veg fyrir faraldur ranghugmynda (sem er hugsanlega of seint).