Ég byrjaði á þessari bloggfærslu í gærkvöldi, ætlaði að safna meiri gögnum í dag en þá breyttist allt og ég missti af skúbbinu. Jæja, svona er þetta stundum. Ég nenni ekki lengur að skrifa færsluna en hendi fram því sem ég var með og bæti við vísunum.

Í fyrradag var Gunnar Örn Kristinsson skipaður formaður bankaráðs Kaupþings. Í dag hættir hann, segir að þetta hafi verið meiri vinna en hann átti von á. Ég kaupi ekki þá skýringu.

Hver er þessi náungi og af hverju var hann skipaður stjórnarformaður Kaupþings?

Nokkrar úrklippur (skjámyndir):

• Telja endurskoðanda læknasjóðs ábyrgan - Fréttablaðið 24.01.2004
• Selja bræðurnar Ormsson - Morgunblaðið 03.09.2004
• Endurskoðandi Tryggingarstjóðs lækna sýknaður. Íhugar meiðyrðamál - Fréttablaðið 01.12.2004
• Máli Gunnars Arnar vísað frá dómi - Fréttablaðið 13.05.2005

Dómur Hæstaréttar. Gunnar Örn er "X". Málinu var vísað frá dómi en þetta hlýtur að teljast áfellisdómur yfir endurskoðandanum Gunnari.

Hópur fjárfesta undir stjórn Gunnars Arnar keypti Bræðurna Ormsson fyrir 644 milljónir króna árið 2004. Á fjórum árum komu þeir fyrirtækinu í þrot þrátt fyrir að hafa selt úr því nokkra bita (lyftuumboð og véladeild). Að lokum tók Landsbankinn yfir reksturinn, afskrifaði mörg hundruð milljónir og seldi fyrirtækið á eina krónu - auk þess að kaupendur tóku yfir einhverjar skuldir. Sagan segir að Gunnar Örn og kó hafi mokað fé úr fyrirtækinu.

Svo virðist sem Gunnar Örn sé ekki rétti maðurinn til að reka fyrirtæki á Íslandi. Hann virðist þvert á móti vera einn af þeim sem rústuðu efnahag þessa lands, tók stöndugt fyrirtæki og skuldsetti í botn - skyldi eftir rjúkandi rústir.

Varla er heppilegt að maður sé skipaður stjórnarformaður eins bankanna þegar annar banki hefur nýlega þurft að afskrifa háar upphæðir vegna fyrirtækis sem hann var í forsvari fyrir.

• Svansson bloggaði í nótt, þorir ekki að hafa opið fyrir komment!
• Fyrrverandi starfsmaður Ormsson bloggar um málið
• Baldvin Jónsson týnir fleira til, m.a. forvitnilega frásögn um bílamál Gunnars.

Þetta er skelfilegt klúður hjá fjármálaráðherra.