Við hjónin höfðum ákveðið að fara á veitingastaðinn Kol í hádeginu einhvern daginn í sumarfríi og þar sem við mætum aftur til vinnu eftir helgi var ekki seinna vænna en að skella sér eftir hádegisboltann hjá mér. Mættum klukkan hálf tvö en eldhúsið lokar klukkan tvö, opnar aftur um hálf sex fyrir kvöldverðargesti.

Ég fékk mér risotto í forrétt (1890kr) (Grilluð paprika, Chorizo, tígrisrækjur, Parmesan, sítrónu-confit, jurtir) og Gyða súpu dagsins (1390kr) sem var maukuð gulrótarsúpa með engifer. Báðir réttir virkilega góðir, risottoið mjög fínt, chorizo og rækjur minna dálítið á spænska paellu. Fengum mjög gott kolað súrdeigsbrauð ásamt smjöri á borðið.

Við fengum okkur bæði lambaskanka (3390kr) í aðalrétt og ég stóðs ekki mátið og pantaði aukalega andafitukartöflur (690kr). Þetta var alveg ljómandi, skankarnir duttu af beinunum en kjötið samt þétt og kartöflumús með dill virkilega góð með. Kartöflurnar alveg syndsamlega góðar, ég á örugglega eftir að koma þarna við og fá mér einn skammt af kartöflum og bjór með!

Við vorum bæði gjörsamlega pakksödd eftir þessa máltíð og spáðum ekki í eftirrétti. Ég var svo saddur reyndar (enda át ég kartöflurnar einn!) að ég sleppti kvöldmat.

Gyða fékk sér rauðvínsglas (1590kr) en ég hélt mig við vatnið. Fyrir okkur tvö kostaði þetta 12.340kr. Þjónustan góð, stóðust vatnsprófið fullkomlega.