Er Séra Örn Bárður hræsnari?

Ég held áfram að vitna í Eyju á vísindavefnum^*.

Helsta einkenni hræsnara er uppgerð eða blekking. Hræsnari þykist vera eitthvað annað en hann er eða þykist hafa skoðun eða trú sem hann hefur ekki í raun. Þetta gerir hann í því skyni að líta betur út í augum annarra. Hræsnari er sem sagt sá sem þykist betri en hann er.

Ef maður fordæmir aðra fyrir hegðun sem hann sjálfur er sekur um og afneitar því jafnframt telst hann hræsnari þar sem hann reynir að sýnast betri en hann í raun er. #

Þann 8. júlí flutti Síra Örn Bárður prédikun í Neskirkju. Meðal þess sem hann sagði var:

...umburðarlyndi felst í því að allir fái að tjá sig og hlusta á aðra og skilja aðrar skoðanir en stöndum fast á okkar skoðun jafnframt. það er mikilvægt að fólk talist við og þekki grunn annarra og viti hvar aðrir standa og hver er undirstaða lífs náungans.

Ég ákvað að athuga hvort innihald væri fyrir þessum orðum og setti athugasemd við nýjustu prédikun hans:

Þú gleymdir alveg að minnast á guðspjallatextann í þessari prédikun.

Jájá, þú eyðir athugasemd minni eflaust, enda segir þú í prédikun þarsíðustu helgar:

Það held ég að sé alrangt því umburðarlyndi felst í því að allir fá að tjá sig og hlusta á aðra og skilja aðrar skoðanir en stöndum fast á okkar skoðun jafnframt. það er mikilvægt að fólk talist við og þekki grunn annarra og viti hvar aðrir standa og hver er undirstaða lífs náungans.

Varla er hægt að ætlast til þess að þú stundir það sem þú prédikar.

Auðvitað var ekki hægt að ætlast til þess. Örn Bárður sendi mér póst og sagðist ekki vilja tala við okkur Vantrúarsinna því reynsla hans af okkur væri svo slæm. Þegar á hann er gengið getur hann ekki rökstutt þetta með neinu öðru en uppdiktuðum dónaskap mínum í athugasemdum á hans síðu - sú ásökun er ósönn. Það sama gerir hann í tölvupóstsamskiptum við mig, segir ósatt um fyrri samskipti okkar og virðist trúa því sjálfur.

Þess má geta að Síra Örn Bárður hvatti kollega sína fyrir nokkru til að lesa ekki Vantrúarvefinn. Það kæmi mér ekki á óvart að hann hvetji kollega sína til að eyða athugasemdum okkar. Hvað sagði hann aftur:

"umburðarlyndi felst í því að allir fá að tjá sig og hlusta á aðra og skilja aðrar skoðanir"

Niðurstaða mín er að ef við notum skilgreininguna af vísindavefnum, prédikun Arnar og svo gjörðir hans er óhjákvæmilegt að draga aðra ályktun en þá að Örn Bárður, prestur í Neskirkju, sé hræsnari.

^* Þess má geta að meðan ég var að afrita þennan texta klukkaði Eyja mig. Þetta hlýtur að vera eithvað kosmískt.