Beikonpestókjúklingur
Í ofninum mallar kjúklingur ásamt kartöflum, lauk og hvítlauk.
Ég útbjó pestó í gærkvöldi og ákvað að nota það að hluta á kjúklinginn. Setti smjör í skál, skar dálítið beikon (held þetta hafi verið fjórar eða fimm ræmur) og saxaði hvítlauk smátt. Hrærði saman við smjörið. Skellti skálinni í örbylgjuofn í smá tíma til að lina smjörblönduna. Tók þrjár teskeikar af pestóinu frá í gær og blandaði saman við. Kreisti smá lime út í.
Lime fór inn í afturendann á kjúlla og beikonpestóblandan undir haminn, yfir báðar bringur. Restinni makaði ég á fuglinn og kryddaði með smá salt og pipar.
Setti allt í sama fat. Er búinn að ausa tvisvar yfir dýrið. Reyni að elda kjúklinginn nógu lengi en ekki of stutt.
Uppfært Svona leit hann út að lokum:
Jóhannes Proppé - 17/08/09 23:26 #
Það spillir heldur ekki fyrir að reka smjörbita og timiangrein niður meðfram bringubeininu.
Kalli - 18/08/09 12:25 #
Hvernig virkar þetta smjörpot miðað við að leggja fuglinn í saltlög? Mest djúsí og bragðbesti kjúklingur sem ég fæ er eftir saltlög en ég hef líka steikt bringur sem voru fylltar kryddsmjöri. Smjörið virtist ekki ná sömu jafnmiklum og góðum áhrifum, á bringunum í það minnsta, og saltlögurinn.
Epli og appelsínur og allt það en samt...
Brynjar - 21/08/09 09:31 #
Ykkur að segja þá horfði ég á ansi magnaðan þátt í gærkvöldi, In search for perfection með vísindakokkinum Heston Blumenthal. Í þættinum leitaði hann hinnar fullkomnu aðferðar við að elda klassískan mat og í þætti gærkvöldsins var það heill kjúklingur. Og til þess að tengja þetta undangenginni umræðu, þá beitti hann meðal annars þessari aðferð, að leggja hann í saltlausn í 6 klst og síðan skola af honum í 1 klst. Svo þetta er greinilega eitthvað sem er þess virði að prófa.
Og ef ég deili með ykkur í fljótu bragði hvernig hans aðferð var eftir lausnina, þá sauð hann hænuna tvisvar sinnum í 30 sek og setti í klakabað þess á milli og svo í kæli yfir nótt. Eldaði hana svo við lágan hita í langan tíma og til að fá stökka húð, þá endaði hann á að steikja hana í tvær mínútur á heitri pönnu.
Svo væru íslenskir kjúklingar alveg efni í aðra umræðu.