Við brugðum okkur í bæjarferð í dag, kíktum í IKEA til að kaupa skrifborðsstól handa Kollu. Eins og iðulega gerist þegar sú búð er heimsótt ratar hitt og þetta í pokann. Hitt sem gerist næstum því alltaf í IKEA er að varan sem maður ætlaði sér að kaupa er ekki til. Ég held satt að segja að þetta gerist í meira en helming tilvika sem ég fer í þetta ferlíki. Kolla valdi semsagt stól, við skrifuðum númer og staðsetningu samviskusamlega á miða og sáum engin merki þess að stóllinn væri ekki til, gengum gegnum alla ganga og komumst svo að því í vörulagernum korteri seinna að fjárans stóllinn var "í pöntun".

Eftir vonbrigðin í IKEA kíktum við í Smáralind þar sem við byrjuðum á kaffihúsi og fengum okkur brauð. Það var ekki ókeypis. Það var eiginlega dálítið langt frá því að vera ókeypis. Djöfull er allt orðið dýrt.

Enduðum ferðina í Hagkaup. Vöruúrvalið í þeirri búð er verra í hvert skipti sem ég versla. Nú var hvorki til spínat né fersk basilika. Úrvalið af kryddi var ansi lélegt og frekar tómlegt í búðinni satt að segja eftir að hillurekkar eru horfnir og ekkert drasl í körfum þar sem rekkar stóðu áður. Af hverju á maður að borga Hagkaup meira fyrir vörurnar ef búðin getur ekki einu sinni státað af almennilegu vöruúrvali?