Ég má til með að afrita þessa athugasemd Theódórs Norðkvist sem hann skrifaði við bloggfærslu trúbróðurs síns.

Halldór, þú sagðir það sem ég ætlaði að fara að segja í blogggrein. Það er traðkað á mannréttindum í nafni mannréttinda.

Illgjarnt lið vill troða litlum börnum í stofufangelsi andlegs og trúarlegs tómarúms, sem búið er að gerilsneyða af trúarlegum áhrifum.

Þetta lið skilur ekki að þar sem er tómarúm treður sér alltaf einhver inn. Hætta er á að það verði múslimar sem brenna af áhuga á því að koma á sharia-lögum. Minnihlutinn mun kúga meirihlutann.

Það er áfall að það skuli vera tekin sovésk ákvörðun um að banna frelsisverk Jesú Krists í skólum barnanna okkar. Með fáránlegum rökum, ef rök er hægt að kalla.

Ímyndið ykkur ef sjómaður á hafi úti dytti í sjóinn. Félagi hans um borð stekkur til og vill kasta til hans björgunarhring. Þá kemur annar háseti frá björgunarhringjalögreglunni og bannar honum það. Segir:

Þú mátt ekki kasta þessum björgunarhring til drukknandi manns, því þá ertu að segja að þessi björgunarhringur sé eitthvað betri en aðrir björgunarhringir. Það hefur aldrei verið sýnt fram á það vísindalega að þessi björgunarhringur sé hinn eini rétti. Með því að kasta hringnum til mannsins í sjónum ertu að brjóta rétt hinna hásetanna til að kasta sínum eigin björgunarhringjum, auk þess sem ekki hefur verið sýnt fram á að þessi drukknandi maður hafi trú á þínum björgunarhring.

Hvað myndi þér lesandi góður finnast um svoleiðis fávitaskap?

Umræðan er svona gáfuleg. Thedór er einn af góða liðinu, illgjarna liðið vill "troða litlum börnum í stofufangelsi andlegs og trúarlegs tómarúms! Það er ekki "illgirni" að taka börn til hliðar í skóla meðan verið er að troða trú í hin börnin, en það er illgirni að vilja hætta að mismuna börnum eftir trúarskoðunum foreldra. Eru þessir trúmenn algjörlega ófærir um að ala börnin sín upp sjálfir? Geta þeir ekki sjálfir skrökvað að þeim um Gvuð og Jesús?

Ég hef áður skrifað um málflutning Theódórs Norðkvist.

Þó það sé hverjum manni augljóst verð ég að leggja áherslu á að titill bloggfærslunnar er fenginn frá Theódór. Hann skrifaði þessa athugasemd og hlýtur að vilja að sem flestir lesi hana. Nei, tilgangur þessa færslu er ekki að troða Theódór í leitarvél, en það er óhjákvæmilegur fylgifiskur.