Það er þjóðfundur í gangi akkúrat núna. Ég er dálítið skeptískur á það fyrirbæri eins og ég er gjarnan, jafnvel þó stemmingin sé góð.

Ég hef farið á starfsdaga þar sem starfsmenn vinna að því að finna gildi sem fyrirtækið á að hafa í hávegum. Þetta hafa verið skemmtilegir dagar þar sem vinnufélagar leysa ákveðið verkefni og djamma svo um kvöldið. Niðurstaða dagsins er tekin saman með þremur eða fjórum orðum og birt á heimasíðu, "gildin okkar eru" áreiðanleiki, heiðarleiki og nýsköpun eða eitthvað þessháttar, stundum jafnvel með japönskum frösum þegar markaðsmenn vilja vera sérlega flottir.

Nema hvað, flestir sem skoða málið vita að gildin skipta engu máli. Þetta snýst ekkert um niðurstöðuna. Tilgangur starfsdagsins er að láta starfsfólki líða betur, láta það fá það á tilfinninguna að það hafi áhrif á raunverulega stefnu fyrirtækisins, sé mikilvægur hluti liðsins. Í raun eru það eigendur, stjórn og stjórnendur sem allar alvöru ákvarðanir taka eftir sem áður. Starfsdagurinn snýst um starfsdaginn, ekki niðurstöðu hans.

Niðurstaða svona fundar (hvort sem það eru gildi eða eitthvað annað) held ég að verði aldrei sérlega áhugaverð. Er fjöldafundur góð aðferð til að finna lausnir? Eftir svona fund er hætt við að hver túlki eftir sínu höfði eins og sást eftir eftir síðasta þjóðfund þegar ríkiskirkjuprestur túlkaði allt sér í hag.

Þannig að ég hef ekki trú á niðurstöðunni og augljóslega er þetta alltof lítið hlutfall þjóðarinnar til að "pepp" tilgangurinn nái fram að ganga. Þúsund manns munu fá þá tilfinningu að þeir hafi áorkað einhverju og eflaust líður þeim vel með það.

Ég ætla samt að vera dálítið leiðinlegur og skeptískur. Tengi þetta við yfirborðsmennsku og gallupstæla sem ég hef ofnæmi fyrir.