Tímamót: Tár, bros og takkaskór
Við erum búnir að vera saman svo lengi, eiga góða tíma og slæma tíma - höfum svitnað saman í mörg hundruð klukkutíma, hlegið, öskrað, pirrast, glaðst og fagnað en nú er komið að endalokum. Tár, bros og takkaskór. Erfitt að velja bestu stundirnar, þær voru svo margar góðar. Ætti maður að velja eitthvað sólóið, jafnvel langskot eða frekar stoðsendingu. Ég veit það bara ekki, þetta var allt best.
Fótboltaskórnir fóru í ruslið. Göt og rifur á báðum - það var ekkert við þessu að gera. Heimurinn er harður, örlögin grimm, ekkert pláss fyrir tilfinningar og væmni. Út með það gamla.
Í staðin nýtt líf, nýtt samband, stærri takkar og vonandi góðar stundir saman í sólinni að elta og spyrna í tuðru sem þenur netmöskva við gífurleg fagnaðarlæti. Skórnir munu rembast við að veita mér hælsæri og blöðrur til að byrja með en ég mæti vopnaður vaselíni og læt ekki bugast.
Keypti mér semsagt nýja takkaskó, kostuðu 7990 krónur í Sports Direct. Ég ætlaði að kaupa svarta og bláa en fann bara stakan skó sem smellpassaði, þetta var eina skósparið af þessari tegund í minni stærð (8us, 7.5uk, 41.3). Og svo eru þeir ógeðslega flottir.
Bragi - 10/08/15 10:27 #
Keypti mér svona í síðustu viku. Svarta. Með minni tökkum. Ég fór í gegnum hina á þriðjudaginn.