"Spotify arðrænir tónlistarmenn" skrifar Egill Helgason í athugasemd. Hvernig gerir Spotify það?

Mér hefur stundum þótt fólk misskilja Spotify. Ég kaupi ekki lag þegar ég hlusta á það á Spotify, ég kaupi (ég er með premimum áskrift) spilun. Ef það er hlustað milljón sinnum á lag á Spotify jafngildir það því að milljón einstaklingar heyri lagið einu sinni í útvarpi. Ef ég hætti að nota Spotify hef ég ekki lengur aðgang að tónlistinni, ég get ekki lánað tónlistina, tekið hana með mér eða selt í Kolaportinu (löglega).

Hvort ætli tónlistarmenn fái meira fyrir eina slíka spilun í útvarpi eða milljón hlustanir á Spotify? Ég hef reyndar ekki hugmynd, en það er rugl að bera Spotify saman við sölu á plötu eða geisladisk.

Að kaupa eða kaupa ekki

Annars fórum við hjónin í Skífuna í Kringlunni á föstudag og ætluðum að kaupa vinsæla breska plötu (á geisladisk). Hún var ekki til nema á vínil og við eigum ekki plötuspilara. Platan er ekki til á tónlist.is og við megum ekki kaupa hana á Amazon eða hjá iTunes. Þessi tiltekna plata er ekki heldur á Spotify.

Hvar ætli platan sé til í góðum gæðum og hægt að sækja með litlum fyrirvara? Jú, auðvitað á torrent síðum.

Þetta er þjónustuvandamál.

Ósönn íslensk sakamál

Framleiðendur sjónvarpsþáttanna Sönn íslensk sakamál halda því fram að það sé ekki hægt að framleiða slíka þætti hér útaf því að fólk steli þeim. Enn og aftur, hvernig er þjónustan? Hvar get ég keypt þessa þætti? Ég get keypt áskrift að sjónvarpsstöð sem ég hef lítinn sem engan áhuga á. Get ég keypt þættina á netinu eða streymt? Hvað kostar það? Getur verið að það kosti mig jafn mikið að horfa rafrænt á þættina einu sinni og það myndi kosta að kaupa DVD pakka sem ég gæti horft á aftur og aftur og svo jafnvel lánað vinum og ættingjum eða selt (löglega) í Kolaportinu?

Ég hef reyndar aldrei séð Sönn íslensk sakamál. Er ekki skortur á áhugaverðum sönnum sakamálum á Íslandi? Varla er hægt að halda endalaust áfram með svona sjónvarpsþáttaröð.